by Thomas Morris | 6th Maw 2019
Mae’r podlediad yn atgyfodi. Yn ganlyniad cyfres o ddamweiniau difyr yn y 00’au cynnar, mae fformat y podlediad wedi prifio ac yn cael ei dderbyn fel ffurf gyffredin o adloniant bellach – a’r un mwyaf democratig gellir dadlau.
Os ydych chi’n elusen neu’n fenter gymdeithasol sydd yn ceisio cael neges allan i gynulleidfa ehangach, yna mae’n hanfodol i chi ddeall a chysylltu â’r cyfrwng yma sydd wedi aeddfedu’n ddiweddar.
![Meic radio o flaen ipad ar gyfer erthygl podlediad](https://www.promo.cymru/wp-content/uploads/2019/03/microphone-2469295_1920-1024x575.jpg)
Tiwnio i’r pod-ddalwyr
Os nad ydych chi’n dyst i’r ffenomenon clywedol cludadwy eto, yna rydych chi’n colli allan! Mae yna sawl rhaglen gwrando ar bodlediadau gwych i roi tro arnynt, gelwir yn pod-ddalwyr (podcatchers).
Mae Apple yn rhoi cefnogaeth swyddogol – ac yn brif geidwad – i’r cyfrwng ers tro, gydag adran podlediadau iTunes. Bellach mae Google wedi rhyddhau rhaglen podlediad swyddogol, sydd yn argoeli’n dda i ddefnyddwyr Android.
Cysylltu â’r podledwyr
Am beth fydd pobl yn siarad amdanynt ar bodlediadau? Mae yna raglenni radio wedi’u haddasu fel The Reith Lectures a Tomorrow’s World y BBC.
Ond mae’r gwir unigoliaeth yn dod gyda’r podlediadau llai, rhai sy’n cael eu staffio gan un neu ddau berson, yn cael eu recordio mewn ystafell wely yn aml – esiampl dda fydda Minty’s Gig Guide to Cardiff, ble mae’n cyfweld cerddorion ar wahanol gyfnodau yn eu gyrfa o’i stiwdio (neu’r ‘ystafell wely’ fel mae’n cyfaddef yn frwdfrydig).
![Hysbyseb podlediad Distraction Pieces](https://www.promo.cymru/wp-content/uploads/2019/03/ads-creative-cdn.acast_.com_media_v1_ad4e2f12-9862-4cf6-b6af-3ae392c45fad_distractionpiecescoverpartofnetwork-inmn47vy.jpg)
Buddiannau podledu
Braint arall sydd gan bodledwyr ydy’r mynediad i ddata cyfoethog am ddemograffeg y bobl sydd yn gwrando ar y podlediad – sydd yn aml yn cael ei gyfoethogi gyda chymuned cyfryngau cymdeithasol agos. Mae llawer o bodlediadau yn ddibynnol ar arddull cyfweliad ar gyfer cynnwys, ac mae cyflwynwyr yn aml yn awyddus iawn i groesawu elusennau i ddod i siarad am eu hachos. Bu Scroobius Pip, podlediwr a’r cerddor, yn cyfweld â Natalie Clapshaw yn ddiweddar o’r elusen anafiadau i’r ymennydd, Headway, ar ei bodlediad Distraction Pieces. Mae Radio Cardiff hefyd yn cyflwyno sioe reolaidd i elusennau gael trafod eu gwaith.
Un o’r pethau gorau am y cyfrwng ydy bod y gwrandawyr yn teimlo cysylltiad yn aml. Mae gwrandawyr wedi cadw amser arbennig yn ystod y dydd, i ddysgu rhywbeth diddorol am y byd wrth ddodi’r clustffonau ymlaen a gwrando.
Hunanlediad
Os ydych chi’n meddwl bydda podlediad yn ffordd dda i gael neges eich sefydliad allan yn well, mae yna sawl opsiwn i chi sydd yn cadw costau’n isel.
Yr opsiwn hawsaf ydy defnyddio’r rhaglen Anchor. Mae posib recordio gyda ffôn clyfar, golygu ar eich cyfrifiadur, a chyflwyno’ch podlediad i iTunes ac, o fan hyn, yr holl pod-ddalwyr eraill, gydag un neu ddau glic.
Fel arall, gellir defnyddio’r rhaglen cyfrifiadur Virtual DJ, sydd yn cynnwys cymysgu aml sianel, i gyd am ddim. Mae’r gwasanaeth gwe Podbean yn cynnig gwe-letya podlediad yn rhad/am ddim, mae Mixcloud yn gwneud hynny hefyd. Os oes gennych chi gyfrif Apple, mae’n hawdd cyflwyno’ch porth RSS i iTunes, ac o’r pwynt yma mae’r byd yn agored i chi.
![Logo Podlediad Strangetown](https://www.promo.cymru/wp-content/uploads/2019/03/Screen-Shot-2019-03-06-at-13.33.41.png)
Here to help
Mae gan ProMo-Cymru brofiad yn cyflwyno hyfforddiant podlediad ac wedi datblygu podlediad i bobl ifanc mewn cydweithrediad â Radio Platfform. Mae Strangetown wedi’i greu i wefan theSprout ar gyfer pobl ifanc yng Nghaerdydd. Gellir gwrando ar y rhaglenni diweddaraf wrth sgrolio i waelod tudalen cartref y Sprout neu ar dudalen Radio Platfform ar wefan Canolfan Mileniwm Cymru.
Os hoffech gymorth i sefydlu Podlediad yna byddem yn hapus iawn i drafod sut gall ProMo-Cymru helpu gyda hyfforddiant. Cysylltwch: arielle@promo.cymru
Gair o gyngor: os ydych chi’n cychwyn podlediad cynnar, nid chi fydd yr unig un. Gan ei bod yn llawer haws i wneud hyn bellach, mae pawb yn dewis gwneud. Bydd rhaid i chi ddeall y diweddaraf yn yr arena glywedol yma – lle da i wneud hyn ydy gyda chylchlythyr Hot Pod Nick Quah a Nieman Lab.